Ayuntamiento de Langreo

www.langreo.as cambia d'imaxe, al empar que'l nuestru conceyu cambia d'aspectu y de fisonomía, p'adaptase a los nuevos tiempos, convirtiéndose nun conceyu modernu, enllenu de atractivos y posibilidaes pal presente y grandes perspectives pal futuru; esi mañana que construyimos güei ente tolos llangreanos y llangreanes, nel que confiamos dafechu y pol que trabayamos con enfotu cada día, ensin escaecer nunca los nuestros oríxenes y ensin perder de vista'l gran legáu que nos dexaron los nuestros antecesores.

Esti cambiu qu'agora aprecien nel nuestru sitiu web nun s'empobina, simplemente, a que los y les internautes vean y perciban, nesta gran plataforma que ye la rede, los progresos y avances qu'esperimentó Llangréu. Y ye que principalmente, www.langreo.as rediseñóse y ameyoróse col envís últimu de facilitar a la ciudadanía la comunicación cola institución del Conceyu, axilizar los trámites ente l'alministración más cercana y los vecinos y, cómo non, pa poner a disposición de tolos que viven nel nuestru conceyu, y de aquellos que quieran conocernos mejor o visitarnos, los medios más rápidos y eficientes para cumplir les sos espectatives y garantizar la consecución del nuestru oxetivu.

Y esi oxetivu nun ye otru más qu'afalar, al traviés d'una mayor accesibilidá, esa fluidez y rapidez na comunicación que yá ye imprescindible anguaño y que vamos impulsar al traviés de les nueves secciones d'esta web y colos que nos sentimos satisfechos enforma: trámites on-line, axenda del conceyu, nuevos equipamientos y prestaciones, desarrollu urbanísticu ya industrial, fomentu del emplegu, apueste pol mediu ambiente, la calidá de vida y la zona rural... a un solo clic.

Espero, sinceramente, que www.langreo.as, --qu'ameyora y amplía los sos servicios, los sos conteníos y la so imaxe y s'adapta, amás, a los nuevos modelos de comunicación social qu'anguaño manden--, vos preste y seya p'acercavos entá más al nuestru conceyu y a l'alministración local. Nel nuestru sitiu web van poder resolver, dende agora, abondos trámites alministrativos, tar al día de l'axenda del Conceyu, cultural y deportiva, por exemplu, o ponese en contactu directu colos servicios del conceyu que precise en cada momentu.

Que vos preste esta travesía “navegando” con nosotros y, por supuesto, que s'acerquen al nuestru conceyu al traviés de www.langreo.as y que'l siguiente pasu seya, si entá nun lo ficieron, visitanos y conocenos personalmente. Vamos recibilos con tola hospitalidá que nos caracteriza.

Bienveníos y bienveníes a Llangréu.

María Esther Díaz García
Alcaldesa de Llangréu